ក្រចេះ៖ កាលពីថ្មីៗនេះគ្រូទាយជោគវាសនា និងប្រកាសថាមើលជំងឺជាសព្វបែបយ៉ាងនៅខេត្តក្រចេះគឺអ្នកស្រី សុខ នី ដែលគ្របស្បង់ចីពរព្រះសង្ឃ អង្គុយតាំងខ្លួនជាព្រះពុទ្ធ លើកដៃផ្ទាញ់អស់មារសត្រូវ បង្ហោះនៅលើបណ្តាញសង្គម រងការរិះគន់យ៉ាងចាស់ដៃពីមហាជន ត្រូវបានមន្ទីរធម្មការ និងសាសនាខេត្តក្រចេះចុះទៅធ្វើកិច្ចសន្យាឈប់ធ្វើសកម្មភាពដែលផ្លូវងងឹតជួយតតាំងជាមួយផ្លូវច្បាប់លែងបានទៀតកាលពីថ្ងៃទី៣១ ខែតុលា ឆ្នាំ២០២៣។

ក្នុងកិច្ចសន្យានោះអ្នកគ្រូមានអាសនៈរាប់ជាន់ និងប្រកាសថាព្យាបាលជំងឺសព្វបែបយ៉ាងខ្លាំង អ្នកស្រី សុខ នី បានរៀបរាប់ថា អ្នកស្រីមិនដឹងទាល់តែសោះថាធ្វើសកម្មភាពបែបនេះខុសច្បាប់នោះទេ។

អ្នកស្រីថា៖ «កាលពីថ្ងៃទី២៩ ខែតុលា ឆ្នាំ២០២៣ នាងខ្ញុំបានយកស្បង់ចីវរព្រះសង្ឃព្រះពុទ្ធសាសនាមកស្លៀកពាក់ ហើយថតបង្ហោះនៅលើបណ្តាញសង្គមពុំបានដឹងថាជារឿងខុសច្បាប់រដ្ឋ និងឆ្គាំឆ្គងក្នុងធម្មវិន័យព្រះពុទ្ធសាសនាឡើយ។ ក្រោយទទួលបានការណែនាំពីអាជ្ញាធរមានសមត្ថកិច្ច នាងខ្ញុំ សូមទទួលកំហុសនិងយល់ព្រមលុបវីដេអូចេញពីហ្វេសប៊ុកវិញ»។

បន្ទាប់ពីអ្នកច្បាប់ទៅដល់ផ្ទះរួចមកអ្នកស្រី សុខ នី បញ្ជាក់ថា ចាប់ពីពេលនេះតទៅខ្លួនឈប់ធ្វើបែបនេះទៀតហើយ បើមានលើកក្រោយ អ្នកស្រីប្រកាសទទូលខុសត្រូវចំពោះមុខច្បាប់ជាធរមាន៕